Дзіўна, яшчэ раніцай, глядзя на шэрае неба, ледзь ня выў воўкам. У галаву лезьлі ўсялякія брыдотныя думкі, і ўвогуле, меньш за ўсё хацелася кудысьці ехаць, што-небудзь рабіць, з кім-небудзь размаўляць.
Але ж дабраўся да ўнівера, убачыў, што за апошні час я нічога не прапусьціў, а тут яшчэ аднагрупнічкі (не, аднагрупніцы, бо хлопцаў на архітэктурным няшмат, ды й яны яшчэ й ня ходзяць на заняткі), а тут яшчэ й сонейка зьявілася, разагнаўшы хмары, - і лепота! Я зноўку стаў сабой.(:
І я зразумеў, што заставацца на тры дні фактычна аднаму для мяне жудасна сумна. І ладна б я быў у якой-небудзь вандроўке, ці пасярод дзікай прыроды - гэта ж зусім іншае. А то ў горадзе.
А калі прыдумляць назву апошнім дням - я бы назваў іх Днямі Нязьдзейсьненых Надзей І Розных Нечаканасьцей.

Слухайце, а хто падкажа, што за фігню я нядаўна бачыў?
Іду паблізу ад Кастрычніцкай плошчы. Бачу, на ходніках стаіць джып. А нумары яго прыцягнулі ўвагу: звычайны эўрапейскі нумар, кшталту PDF 350, зьлева на сінім фоне зоркі ЭЗ, а пад німі, там, дзе зьмяшчаюцца літаркі краін, замест іх герб Рэспублікі Беларусь.
Гэта што - прышпіл, ці я нешта прапусьціў і Беларусь увайшла ў ЭЗ??

Учора краіна павінна была заходзіцца ў захапленьні і эйфарыі, сьвяткуя Дзень Дзяржаўных герба і сьцяга. (Дарэчы, заўважце, што менавіта дзяржаўных, а не нацыянальных, якімі, па ідэе, павінны зьяўляцца сымбалі краіны.)

Па ўсіх тэлеканалах распавядалі пра значэньне сымболікі. Памятаю, як у школцы мяне вучылі, што чырвоны колер сымбалізуе кроў, якую праліў беларускі народ, зялёны колер - колер лясоў, якімі багата Беларусь, ну арнамент - ён проста нацыянальны.
А вось зараз трактоўка зьмянілася. Па-першае, у Панараме паведамілі, што беларускі сьцяг ёсьць трыкалёрам, і без аніякіх, бо ў ім тры колеры. Між іншым, трыкалёрам зьяўляецца сьцяг, складзены толькі з трох колераў, без усялякіх дадатковых аздабленьняў (гл. Триколор).
( Далей - болей. )

Ну што сказаць? Дзяржаўнымі сымбалямі зьяўляюцца тыя, сьвята чыіх было ўчора, але нацыянальнымі назаўсёды застануцца бел-чырвона-белы сьцяг і Пагоня. І так будзе роўна столькі, сколькі будзе доўжыцца ўлада аднаго вядомага нам чалавека.

Дарэчы, фотарэпартаж са сьвята глядзець тут.

Толькі што паглядзеў просты этэр зь Нясьвіжу ў навінах на СТБ, куды зазірнуў з чарговай працоўнай паездкай Лукашэнка.

Ходам рэканструкцыі Нясьвіжскага палацу ён застаўся крайне незадаволеным. Загадаў прыпыніць ход рэканструкцыі з тым, каб праз тыдзень было вызначана суместнае рашэньне па ходу далейшых работ.
Таксама ён прапанаваў перанакіраваць сродкі на рэканструкцыю наўпрост мясцоваму кіраўніцтву. "Если ты к 9 мая 2010 года завершишь работы, я тебе вот прямо в руки все оставшиеся деньги дам, согласен? А всё, что останется, что сэкономишь - всё твоё." "Мне не нужны такие... кто пальцем в зубах, в носу ковыряется, выбирая, ту ему решётку поставить, или эту".
Зьявілася такое адчуваньне, што ўрэшце рэшт ад палацу застанецца толькі назва...