Шчыра кажучы, сябры, мяне проста задзяўблі ўсе гэтыя рэакцыі ў жж на апошнія мітынгі. Канешне, яны выліваюцца ня толькі ў допісы блёгаў, але менавіта я з большага бачу іх тут, бо ня так шмат у мяне знаёмых у рэале, зьвязаных з апазыцыяй.

Мяне задзяўблі паўсюль бачныя тэзісы, што "яны ў чарговы раз зрабілі нейкае ўнылае гаўно, а я вось, такі малайца, нават і не пайшоў, бо і так ведаў, чым усё скончыцца", ці "...пайшоў, але паглядзеў на гэта й хутка сышоў", ці "...пайшоў, быў разам з усімі, але яны зноў нічога ня здолелі зрабіць і прасралі чарговы мітынг".

Роўна як мяне задзяўблі тэзісы, што "мы вось прыйшлі і, хаця мы й не зрабілі таго, што маглі, мы ўсё роўна крутыя змагары".

Калі вы вырашылі ісьці й падпарадкоўвацца плянам арганізатараў, пра якія ўсе звычайна ведаюць загадзя - ідзіце й не бухціце потым. Калі вы вырашылі дзейнічаць насуперак - зьбірайце паплечнікаў ды дзейнічайце. Калі вы вырашылі сядзець па хатах, таму што ўсё роўна будзе "унылае гаўно" - дык сядзіце й маўчыце. Якія яшчэ могуць быць варыянты? А сядзець потым у жж ды крычэць, што ўсе дурні, адны мы такія разумныя ня варта. Як кажуць, дарагое яечка да Вялікадня.

Што маю сказаць?
Абсалютна мірная акцыя, вызначыўшаяся толькі выхадам групкі людзей з расьцяжкай на вуліцу Сурганава пасьля пераходу праз вул.Я.Коласа. Аднак яны хутка былі завернуты назад, пры чым не амапаўцамі (якіх і бачна не было), і не міліцыяй (адна машына якой ехала ззаду выйшаўшых і заклікала іх вернуцца на ходнікі), а самімі жа арганізатарамі шляху.
У раёне ўздоўж маршрута дыслякаваліся некальнкі аўтазакаў і аўтобусаў са спэцназам, але ўсе яны так і засталіся схаванымі. Потым толькі былі заўважаны некалькі самотна зьязджаўшых аўтазакаў.
Спадабаліся барабаны анархістаў. Калі б яны не перашкаджалі пад час прамоў на Акадэміі, было б увогуле цудоўна, бо рытм яны задавалі добры.
Ёлы-палы, з-за адсутнасьці якой-кольвек агрэсыўнай рэакцыі ўладаў, нават і ня ведаеш, што сказаць. Не, жартую, канешне. Як сказаў Севярынец ля храму, улады далі разьвязалі нам рукі, чакаючы, што мы павядзем сябе агрэсыўна, але мы прайшлі як цывілізаваныя эўрапейскія людзі, прыкладна такі сэнс ягоных слоў. Ну, калі б яны насамрэч жадалі разьвязаць рукі, то дазволілі б прайсьці праз горад да пл.Незалежнасьці.

Такім чынам, усё цалкам нармальна, без форс-мажораў, і заклікі гучалі менавіта аб Чарнобылі й супраць АЭС (сярод іншых, канешне), і геі былі незаўважныя на фоне людзей, і сабралося нямала (па розных адзнаках- ня меньш за 2-3тыс., што на фоне апошніх акцыяў няблага).

Што "прыемна" зьдзівіла - Дзьмітры Паўлічэнка «вітае» ўдзельнікаў Чарнобыльскага шляху (відэё). Ну калі раней паказвалі фігу, то цяпер ужо фак - яўны рух Беларусі ва Эўропу.


Храналёгію "ЧШ-2008" глядзіце тутака.

Яшчэ раз нагадваю, што сёньня, а 14-й гадзіне на Акадэміі навук пачнецца "Чарнобыльскі шлях".
4 гадзіны засталося, але памятайце, калі вы будзе чытаць гэты допіс цягам тых чатырох гадзін, што прыйсьці ніколі ня позна.

Я буду там. Не таму, што пайду не таму, што хтосьці там будзе крычэць "Жыве Беларусь!". І не таму, што трэба адпрацоўваць грошы дзеля нейкіх там грантасмокаў. І безумоўна ж не таму, што мне проста вельмі хочацца адрэналінчыку.

Пайду таму, што ў мяне ёсьць свая грамадзянская пазыцыя.
Так, мне не падабаецца ідэя будаць АЭС у Беларусі, а тым больш пры сёньняшніх абставінах у краіне.
Так, мне не падабаецца, што адходы з гэтай АЭС будуць закопваць у нас пад нагамі.
Так, мне не падабаецца стаўленьне ўладаў да праблемы Чарнобыля. Гэта і скасаваньне ільгот чарнобыльцам, і адсутнасьць неабходных мер па ліквідацыі наступстваў, і асваеньне забруджаных зямель.
Так, я жадаю, каб нарэсьце дзяржава пачала агучваць аб'ектыўную інфармацыю.
І безумоўна ж, мне зусім не падабаюцца тыя працэсы, што назіраюцца ў краіне апошнія месяцы. Інакш як прававым Чарнобылем назваць гэта складана.

Вось таму я прыйду. Спадзяюся, што ўбачусь і з вамі. Будзем разам,сябры!

ЗЫ. Знайшоў цікавы сайт, прысьвечаны 20-й гадавіне аварыі на ЧАЭС. Хто зацікавіцца - націсьніце на малюнак, каб перайсьці на сайт.

22 гады прайшло з моманту катастрофы на Чарнобыльскай АЭС. Праз два дні, 26.04, адбудзецца чарговы "Чарнобыльскі шлях".



Усе мы ведаем аб рашэньні уладаў аб будаўніцтве беларускай АЭС. Як і заўсёды, гэтае рашэньне яны прынялі, не спытаўшы ў нас, у народа, які ўжо пацярпеў ад Чарнобыля.
Кіраўніцтва дзяржавы замоўчвае факты аб выніках катастрофы 1986 года, не дае інфармацыю аб узроўні забруджваньня тэрыторыяў і наступствах ядэрнай катастрофы.
Пашыраюцца плошчы зямель, якія яшчэ некалькі год таму абвяшчаліся забруджанымі, а цяпер на іх сеюць збожжа і пякуць зь яго хлеб.
Скасаваныя шматлікія ільготы ліквідатарам аварыі на ЧАЭС і пацярпелым ад яе.

Ахвярамі Чарнобыля сталі 300 тысяч чалавек, больш за 600 тысяч ліквідатараў прымала ўдзел у ліквідацыі наступстваў аварыі, колькасьць людзей, тым ці іншым чынам пацярпелых ад аварыі не паддаецца падліку.
Вы хочаце жыць з бомбай запаволенага дзеяньня? Не?
Вы хочаце, каб вашу краіну забруджвалі ядэрнымі адходамі? Не?
Вы хочаце, каб з вашай кішэні дасталі 4 мільярды даляраў на будаўніцтва АЭС, працаваць якая будзе максымум 40-50 год? Не?
Вы хочаце, каб зьявілася нарэсьце праўдзівая інфармацыя аб наступствах аварыі на ЧАЭС і аб плянах будаўніцтва новай АЭС? Так?

Тады прыходзьце 26 красавіка ў 14:00 на Акадэмію навук!

Памятайце, што 26 красавіка - Міжнародны дзень дзеяньняў супраць атамнай прамысловасьці.
Памятайце, што "Чарнобыльскі шлях" - ня мітынг апазыцыянэраў. Гэта - шлях тых, хто выступае за адкрытасьць інфармацыі і супраць будаўніцтва атамных станцый у Беларусі.

Далей трошкі падрабязьней пра маршрут, а таксама некаторыя камэентары.

( чытаць далей )



Мінгарвыканкам дазволіў правядзеньне мітынгу па маршруце ад Акадэміі навук да плошчы Бангалёр.

А 14-й гадзіне - пачатак шляху ля Акадэміі навук.
Да 15-й гадзіны мітынг там жа.
Шэсьце да храма-помніка ахвярам чарнобыльскай трагедыі на рагу Арлоўскай і Карастаянавай.
Пракладна ад 18-й да 19-й гадзіны мітынг ля храма.
А 19-й гадзіне - заканчэньне мітынгу.

UPD Што на гэты конт думае сп.Койпіш coipish: http://coipish.livejournal.com/377281.html

У працяг мінулага допісу.

Судзьдзя сапраўды выканала сваё абяцаньне абвясьціць прысуд не раней за 11:00. Бо гэта было зроблена толькі а 13-й гадзіне.
Увесь час дагэтуль у суд нікога не пускалі. Абвінавачваныя, адвакаты й журналісты маглі праходзіць ва ўнутраны дворык, а ўсе астатнія чакалі на вуліцы. Рабіць было няма чаго, усе стаялі й чакалі, выказваючы свае меркаваньні наконт таго, калі ўсё ж абвясьцяць прысуд. Стаялі й ахоўнікі ў штацкам побач са спэцназаўцамі, ахоўваючы ўваход. А вось спэцназаўцы, якія стаялі насупраць, праз вуліцу, знайшлі сабе фаны занятак: яны ўдвух пачалі кадымаць каменьчыкі зь зямлі й кідаць іх праз агароджу "Дынама", імкнучыся патрапіць у круглыя адтульны ў агароджы. Потым, калі ім гэта надакучыла, яны пайшлі да бліжайшага дрэва й пачалі ці то пільна разглядаць яго кару, ці то штосьці на ёй пісаць. Карацей, забаўляліся як маглі. У мінулы раз, дарэчы, яны пачалі жаваць лісьце з хмызьняку.

Нарэсьце пачаўся гэты пяты дзень працэсу.
( чытаць )

Абвінавачваныя Бондар, Дубскі, Крываў, Пашкевіч, Стральцоў, Чарнышоў і Цішкевіч прызнаны вінаватымі па ч.1 арт.342 УК РБ. Іх віна, як палічыў суд, цалкам даказана. Прысуд - 2 гады абмежаваньня свабоды без накіраваньня ў папраўчыя ўстановы. Застаючыся пад падпіскай аб нявыезьдзе, усе яны будуць працаваць па сваім асноўным месцы працы, сплочваючы 20% ад заробку.
Абвінавачваныя Сяргееў, Койпіш прызнаны вінаватымі па ч.1 арт.342 УК РБ. Іх віна, як палічыў суд, цалкам даказана. Прысуд - штраф 3 млн 500 тыс.руб. з кожнага.
Абвінавачваны Кім прызнаны вінаватым па арт.364 УК РБ. Яго віна, як палічыў суд, цалкам даказана. Прысуд - 1 год 6 месяцаў пазбаўленьня свабоды з накіраваньнем у папрачую калёнію агульнага рэжыму. Тэрмін пачынаецца ад 21.01.
Таксама з кожнага сыскана па 3 тыс 500 рублёў на судовыя выдаткі.
Акрамя таго, прызнаць за транспартнымі ўстановамі права на пакрыцьцё шкоды шляхам падачы грамадзянскіх іскаў.
Прысуд можа быць аспрэчаны ў Цэнтральным судзе ў дзесяцідзённы тэрмін з моманту яго абвяшчэньня.

( далей )


Такім чынам, прынамсі двум далі штраф, астатнім "хімію", але ж без накіраваньня ў іншы горад. Ну й Кім, канешне ж, Кім. Паўтары гады. І ўсё гэта толькі за тое, што яны прыйшлі падтрымаць людзей (а некаторыя й самі былі прадпрымальнікамі ці займаліся гэтай дзейнасьцю раней), выказалі сваю грамадзянскую пазыцыю. Бо кожны, хто быў, хто бачыў гэты фарс, гэтыя так званыя доказы, ведае, што яны не вытрымліваюць аніякай крытыкі. Яны селі толькі за тое, што не спужаліся прыйсьці. Гэта быў суд, накіраваны запужаць іх і астатніх. Ня выйдзе, сапраўды, рэакцыя атрымліваецца як раз адваротная.

( некалькі цытат працэсу )

Не забудзем!


Невялічкая рэфлексія на тэму.

Працягваючы непасрэдна мінулы допіс, а празь яго і ўсю тэму "Працэсу 14-ці"...

Пасьля спрэчак бакоў справа неўзабавае дайшла да апошніх слоў абвінавачваных.


Апошнія словы.
(Прыводзяцца вытрымкі з маналёгаў. Кожны сказ - цытата.)


( тэкст )


17:00. Судзьдзя абвясьціла судовае паседжаньне зачыненым, а вынас прысуду прызначыла на 22 красавіка, "не раньше 11:00".

Калі выходзіў з будынку суда, адзін з спэнцаназаўцаў (напэўна, самы разумны) запытаўся: "Ну чо, уже посадили?"
Непасрэдна пасьля стаялі групкай на вуліцы - прысутнічаючыя, журналісты, тыя, хто так і не патрапіў на паседжаньне. Спэцназаўцы на гэта паглядзелі хвілін пяць, а потым сталі настойліва патрабаваць, каб мы разышліся. У размовах з адным МУСаўцам у штацкам высьветліў, што, аказваецца, нават есьці сасіску ў цесьце на вуліцы ля суда нельга, бо гэта "неуважение к суду". Тым часам, з васьмі раніцы я нічога ня еў, таму мы даволі міла зь ім паразмаўлялі, пакуль я заканчваў, ну а пасьля чаго ўсё ж разышліся.


Так, безумоўна, судзьдзя як чалавек пастаўлена перад цяжкім выбарам: цалкам апраўдаць абвінавачваных (тое, што яны невінаватыя па тым угалоўным артыкулам, па якім на іх заведзена справа, відавочна), але згубіць пасаду судзьдзі, ці пайсьці на пагадненьне з сумленьнем і падтрымаць абвінаваўцу ў прапанавным пакараньні невядома за што. Што яна абярэ? Чакаць засталося зусім нядоўга.

У працяг мінулага допісу

Пачатак тэмы:
http://donjeune.livejournal.com/105970.html - судовы цырк. дзень другі.
http://donjeune.livejournal.com/106103.html - судовы цырк. дзень трэці.
http://donjeune.livejournal.com/106357.html - судовы цырк. дзень трэці.-2 Паказаньні Ігара Ледніка

Чацьверты дзень пачаўся з таго ж, з чаго пачаўся й першы,- спэцназаўцы й супрацоўнікі МУС у штацкім адмаўляліся прапускаць усіх, акрамя абвінавачваных, адвакатаў ды родных і блізкіх. Матывавалі ўсё гэта клопатамі аб тым, каб хапіла месцаў для родных. На пытаньні, хто даў такі загад, не адказвалі, пры спробах спакойна прайсьці адпіхвалі ўбок, паглядаючы нахабнымі вачыма. Аднак урэшце рэшт праз паўгадзіны большасьць з прысутнічаючых патрапіла ў залю, у тым ліку й я, адным з апошніх, якіх здолелі працягнуць.
У 11:40 (замест 11:00) паседжаньне пачалося. З боку абароны былі прыведзены тры сьведкі й было пададзена хадайніцтва аб іх допыце. Судзьдзя адказала, што судовае сьледства ў пятніцу было аб'яўлена зачыненым, пра што, дарэчы, ніхто, акрамя яе й абвінаваўцы ня чуў, а падстаў дзеля ўзнаўленьня сьледства ня маецца. Абвінавачваныя пачалі былі апратэстоўваць гэтае рашэньне, але скончылася гэта заўвагай Койпішу з занясеньнем у пратакол. Нагадаю, што судовае сьледства й допыт сьведкаў могуць быць адноўлены нават пасьля судовых спрэчак, якія пачаліся сёньня. Напрыканцы заўвага ў пратакол была зроблена й Пашкевічу.


Судовыя спрэчкі.
(Трэба заўважыць, што прыведзены тэкст не зьяўляецца цытатамі ў поўным сэньсе гэтага слова.)


( тэкст спрэчак )

Працяг - апошнія словы абвінавачваных - у наступным запісе.
Нагадаю, па словах судзьдзі, прысуд будзе вынесены "22 апреля, не ранее 11:00".

У працяг мінулага допісу.

Пад час трэцяга дня судовага паседжаньня, пасьля прагляду відэаматэр'ялаў, судзьдзя ўсё ж згадзілася дапрасіць сьведкаў з боку абароны. Вызваны былі Дар'я Гудкова, пра якую напісана некалькі слоў у мінулым запісу, а таксама Ігар Леднік. Апошні даў ня толькі вусныя, але й пісьмовыя паказаньні, якія былі далучаны ды матэр'ялаў справы. Тэкст паказаньняў вылажыў у сваім жж coipish: http://coipish.livejournal.com/370497.html

Крос-пост:

"Spadar Ji.Lednik učora davaŭ nia tolki vusnyja, ale taksama j piśmovyja pakazańni, jakija byli dałučany da materyjałaŭ uhałoŭnaj spravy. Text pakazańniaŭ pad cutam.
Tam, siarod jinšaha, prysutničaje argumentavanaje tłumačeńnie supraćzakonnaści našaha pieraśledu j tłumačeńnie abstavin dy padstaŭ taho pradprymalnickaha pratestu, jaki my padtrymali.

Г. И.Ледник вчера давал не только устные, но также и писменные показания, которые были преобщены к материалам дела. Текст паказний под катом.
В них, среди прочего, аргументированное пояснение противозаконности нашего преследования а также причины и обстоятельства того предпринимательского протеста, который мы поддержали.

( тэкст паказаньняў сьведкі І.Ледніка )

У працяг мінулага допісу.

Трэці дзень "Працэсу 14-ці".
Судовае паседжаньне пачалося зноў зь невялікім спазьненьнем, прыкладна ў 10:10.

Але дагэтуль, яшчэ перад пачаткам, ля ўваходу ў суд, побач з сабраўшыміся знаёмымі, блізкімі асуджаных і ўсімі, хто прыйшоў іх падтрымаць, была заўважана кампанія нейкіх хлапцоў, зьяўляўшыхся па чутках ці то брсмаўцамі, ці то нейкімі курсанцікамі. Тое, што яны былі ня "нашыя", бачна было так, як бачна "людзей у чорным" на мітынгах. Трохі пазьней стала відавочна, дзеля чаго іх прывезьлі на паседжаньне ў асобным аўтобусе.

Пачаўся трэці дзень зь яшчэ адной непрыемнай навіны. Пасьля першага дня, калі працэс быў фактычна зачынены для жадаючых падтрымаць абвінавачаных, паьля другога дня, калі ўсё ж згадзіліся пусьціць людзей у залю суда, на трэці дзень зьявіўся нейкі сьпіс, якім карысталіся супрацоўнікі аховы, дзеля таго, каб вырашаць, прапускаць ці не ў залю. Тым часам, увайшоўшые сутыкнуліся зь яшчэ адной праблемай: тыя самыя прывезеныя занялі амаль усе два апошнія радкі лаў. Такім чынам, з-за ўсіх гэтых перашкод у залю не патрапіла значная колькасьць людзей, у тым ліку блізкія й родныя абвінавачваных.
Як толькі пачалося паседжаньне, усе абвінавачваныя выступілі з хадайніцтвам аб тым, каб гэтую кампанію вывелі з залі суда, а замест іх дапусьцілі родных, якія павінны прысутнічаць пад час працэсу. Хадайніцтва было адхілена на падставе таго, што на паседжаньне могуць прыходзіць усе жадаючыя й не ў кампетэнцыі суда разьмяркоўваць, каму прыходзіць, а каму не.

( частка першая. Кім і відэаматэр'ялы. камэнтары, заўвагі )

13:00. Абвешчаны перапынак да 14:00.

( частка другая. правакацыі імбіцыльчыкаў. працяг прагляду. камэнтары, заўвагі )


Працяг паседжаньня ў панядзелак, пачатак у 11:00.


Што маю сказаць? Відэаматэр'ял, які павінен, напэўна, быў стаць цвіком нумара, праваліўся.

1. Галоўнае: Кім нікога ня біў. Гэта добра бачна на запісу, які, як сцьвярджалася, паказвае момант, калі Сычову нанесьлі траўму. Больш таго, менавіта Кіма цягалі за валасы, пасьля чаго ён упаў.
2. Машыны хуткай дапамогі мітынгуючыя прапускалі. Налічыў дзевяць момантаў на запісу.
3. Так, праспэкт перакрывалі. Але не на паўтары гадзіны, а ў асноўным калz падземных пераходаў, таму што спускацца туды не было ніякай магчымасьці. Ну й на плошчы Незалежнасьці, калі мітынгуючых сустрэў не Сідорскі, а АМАП, які паціснуў натоўп ад Дому Ўраду да праспэкту.
4. Так, былі перашкоды для транспратнага руху. Але кіроўцы як аўтобусаў, так і машын мелі магчымасьць разгарнуцца й паехаць па абыходных шляхах.
5. Сьведкі абвінавачаньня й пацярпелы давалі супярэчлівыя, а часам і ілжывыя паказаньні.


Таму,
перадузятаму суду ГАНЬБА,
невыконваючым свае абавязкі ахоўнікам у залі суда ГАНЬБА,
сьведкам і пацярпеламу ГАНЬБА.

Сьведак і пацярпелага НЕАБХОДНА прыцягнуць да адказнасьці за ілжывыя паказаньні.

Сёньня быў другі дзень "Працэсу 14-ці" над удзельнікамі мітынгу прадпрымальнікаў 10-га студзеня.
На гэты раз у залю дазволілі прайсьці ўсім жадаючым. За гэта трэба падзячыць па-першае саміх абвінавачваных, якія адмаўляліся заходзіць у залю, пакуль не дазволяць зайсьці астатнім, а па-другое журналістам, ведаючым куды трэба тэлефанаваць і што казаць.
У 11:20 нарэсьце пачалося судовае паседжаньне.

( пра паседжаньне, словы сьведкаў, матэр'ялы, заўвагі, камэнтары )

Як было бачна, сьведкі блыталіся ў сваіх словах, некаторыя нават ня памяталі вуліцы, дзе адбываўся мітынг, блыталі напрамкі, супярэчылі адно аднаму. Нарпыклад пра перакрыцьцё прашпэкту. Адыныя казалі пра дзьве паласы, другія пра чатыры, трція пра ўсе восем. Транспарт ці то хадзіў, ці то не. Хуткую дапамогу ці то пускалі, ці то не. І так амаль па кожным пункце. Шчыра кажучы, мяне не пакідае адчуваньне, што гэта проста паказальны працэс, каб запужаць астатніх. Штосьці кшталту таго, што адбылося з былым спэцназаўцам, які перайшоў да апазыцыі, удзельнічаў у мітынгах, а пасьля ў яго знайшлі наркотыкі й асудзілі на 10 год.
Ну што, працяг заўтра, а 10-й гадзіне. Засталіся прагляд відэаматэр'ялаў і апошнія словы.

Ну а пра першы дзень вы можаце паглядзець, напрыклад, тут. Ці тут.

Вырашыў такі напісаць невялічкі допіс пра ўчорашнюю акцыю, які грунтуецца перш за ўсё на маіх уласных назіраньнях, а таму не прэтэндуе на аб'ектыўнае асьвятленьне падзей. Проста мой погляд на падзеі.

( Частка з маімі ўласнымі назіраньнямі )


Ну а вось вам некалькі спасылак на афіцыйныя крыніцы:
Супрацьстаяньне на Дзень Волі (фота)
Дзень Волі (фота)Расьсечаны Дзень Волі (хроніка, фота, відэа)
Фоторепортаж с акции в честь Дня воли
Мы дайшлі! (фота з МБНФ)
Галоўны міліцыянер Менска падсумаваў Дзень Волі
Photos results for minsk

Дарэчы, былі затрыманыя нават прадстаўнікі літоўскага тэлебачаньня. Пасьля іх выпусьцілі, але відэа канфіскавалі.

ЗЫ. Дарэчы, пад час разгону ўдзельнікаў акцыі, адбылося сутыкненьне аўтазака з маршрутным таксі. Кіроўца аўтазака здаваў задам і не заўважыў таксі. Цікава, хто будзе пакараны?

UPD P.S. Як сказала мне маці, калі я вярнуўся дамоў (а яна ня ведала, дзе я быў): "В тебе что-то изменилось. Что-то в твоём лице." Ня ведаю, я, здаецца, не заўважыў, але хто яго ведае...

UPD2 http://lesnoi-slon.livejournal.com/202174.html#cutid1 пачытайце, добра напісана

Сёньня адбыўся чарговы мітынг у падтрымку патрабаваньняў ІП па скасаваньні п.1.1 Указа №760 і дапрацоўкі падаткавага заканадаўцтва у той частцы, якая тычыцца ЧУП. Як і раней, было шмат чутна выказваньняў кшталту “Вас там ніхто ня зваў”, “Хай яны разьвязваюць свае пытаньні самі”, “Так ім і трэба” ну й г.д. Як і раней, шмат з саміх ІП вырашыла адсядзецца па вуглах, спадзяючыся, што хтосьці прыйдзе замест іх і штосьці зробіць. Агульная праблема ўсіх грамадзян нашае краіны.
Падчас мітынгу пачуў ад аднаго мужчыны, Рамана, які сам працаваў на прадпрымальніка на кніжным кірмашы выказваньне, вельмі трапна адлюстроўваючае становішча беларускага народа. Зьмест яе наступны:

Жыў такі вядомы скульптар па прозьвішчу Азгур. Ён быў аўтарам помнікаў Купале ды Коласу. І паставіў ён у свой час іх фактычна па ўласнай ініцыятыве, не чакаючы, пакуль зьбяруць неабходныя дазваляльныя подпісы. Потым, праз пэўны час, у інтэрвью да яго зьвярнулася журналістка зь нейкай саюзнай рэспублікі з пытаньнем: “А каму вы паставілі гэтыя помнікі?” Ён адказаў: “Ведаеце, былі раней такія вялікія беларускія паэты, Янка Купала ды Якуб Колас. І пісалі яны для тых беларусаў, якія жылі побач зь імі.” “А чаму вы сказалі “жылі”? Зараз што, няма іх?” “Так, зараз на Беларусі жыве нейкая супольнасьць людзей, толькі па этна-лінгвістычным паказчыкам адносячаяся да беларусаў.”

Нажаль, гэта толькі мой вольны пераказ, таму калі хто ведае гэтую гісторыю, удакладніце, калі ласка. Але ж вось сэнс выдатна адлюстроўвае сучаснасьць. “Толькі па этна-лінгвістычным паказчыкам…” А лыжкі(from Matrix) нацыі няма.

Далей кароценькі пераказ падзей з маёй кропкі гледжаньня. Калі ёсьць жаданьне, пашукайце больш падрабязную інфармацыю. Знайсьці лёгка: ці праз беларускія суполкі ў жж, ці, што лепш, праз апазіцыйныя сайты.

( Read more... )

UPD (+дададзены тэксты расьцяжак) ЗЫ. Калі людзі ўбачылі АМАП ля Дому Ўрады, яны пачалі крычэць на іх "Ганьба!" і "Фашысты!". У адказ пачулася "Спекулянты!". Напэўна, праз некалькі мітынгаў ужо самі АМАПаўцы будуць выхадзіць супраць нас з расьцяжкамі ды лёзунгамі-крычэлкамі...